तोंडात बॉम्ब फुटल्याने गाय गंभीर जखमी; दोषींवर कठोर कारवाई करण्याची मागणी जोर धरत आहे.
कोरोना सारख्या महारोगानंतर या वर्षीची दिवाळी निर्बंधाशिवाय साजरी केली गेली. २ वर्षानंतर हि दिवाळी आल्याने सर्वत्र दिवाळीचे स्वागत केले गेले. सगळीकडे गोडधोड पदार्थ बनविणे दिवाळीला नवीन कपडे घेणे अशी काम करताना सर्व लोक दिसले गेले. त्याच प्रमाणे फटाके सुद्धा उडवले गेले पण तुम्हाला हे माहित आहे का कि हि दिवाळी आपण साजरी करत असताना आपल्याला एका गोष्टीची काळजी घ्यायची असते ते म्हणजे फटाके उडवताना कोणालाही इजा नाही पोहोचली पाहिजे.
पण एके ठिकाणी चक्क एका गोमातेला या फटक्यामुळे इजा झाली आहे. हो ! आत्तापर्यंत आपण पहिले असेल कि, काही लोक रस्त्यावरच्या भटक्या जनावरांना जाणीवपूर्वक त्रास देतात. याबाबत सोशल मीडियावर अनेक व्हिडिओ नेहमीच व्हायरल होत असतात. सध्या उत्तर प्रदेशातील कानपूरमधल्या एका घटनेचा व्हिडिओ सोशल मीडियावर जोरदार व्हायरल होत आहे. आणि हा व्हिडिओ पाहून लोकांनी संताप व्यक्त केला आहे. दारुच्या नशेत असलेल्या काही लोकांनी गायीच्या तोंडात बॉम्ब फोडल्याचं समोर आलं आहे. यामुळे गायीचा जबडा पूर्णपणे फाटला असून, या गायीवर सध्या उपचार सुरू आहेत.
ही घटना घडल्यानंतर दोषींवर कडक कारवाई करावी, माणुसकीला काळिमा फासणारी हि घटना असून, अशा स्वरुपाच्या प्रतिक्रिया लोकांकडून व्यक्त होत आहेत. पोलीस यंत्रणा या घटनेचा तपास करत असून, स्फोट नेमका कशानं झाला हे जाणून घेण्यासाठी सीसीटीव्ही फुटेज तपासलं जात असल्याची माहिती पोलिसांनी दिली आहे. सदरची घटना कानपूरमधील काकादेव परिसरातील घडली असून एम ब्लॉकमध्ये दारुच्या नशेत असलेल्या काही लोकांनी शुक्रवारी भटक्या गायीच्या तोंडात बॉम्ब लावून फोडला. यामुळे गायीचा जबडा फाटला आहे. स्थानिक लोकांनी या घटनेची माहिती महानगरपालिकेच्या अधिकाऱ्यांना कळवली.
या गायीच्या तोंडात बॉम्ब फुटल्याने गायीचा पूर्ण जबडा फाटून रक्तबंबाळ झाला. लोकांनी या गायीचा फोटो सोशल मीडियावरून शेअर केला आहे. या फोटोवर लोकांनी कमेंट केल्या आहेत. ही घटना माणुसकीला लाजवेल अशी आहे, अशा स्वरुपाच्या कमेंट लोकांनी या फोटोवर केल्या आहेत. दरम्यान, ही घटना घडल्यानंतर स्थानिक लोकांनी महानगरपालिकेच्या टीमला या संदर्भात माहिती दिली. त्यानंतर महापालिकेच्या जनावरे पकडणाऱ्या पथकाने या जखमी गायीला उपचारांसाठी पशुवैद्यकीय रुग्णालयात नेले. ‘जखमी गायीवर उपचार सुरू आहेत.’ अशी माहिती महापालिकेचे मुख्य पशु चिकित्सा अधिकारी यांनी दिली आहे.
या बाबत मिळालेली माहिती अशी आहे कि, “कचऱ्याच्या ढिगाऱ्याजवळ चरत असताना झालेल्या स्फोटात एक गाय जखमी झाली आहे. हा स्फोट कशामुळे झाला याचा तपास सुरू आहे. यासाठी सीसीटीव्ही फुटेज तपासलं जात आहे. सध्या या जखमी गायीवर पशु चिकित्सालयात उपचार सुरू आहेत,.” या घटनेविषयी लोकांमधून संतप्त प्रतिक्रिया उमटत आहेत. लोकांनी सोशल मीडियावरही याबाबत प्रतिक्रिया व्यक्त केल्या असून, दोषींवर कठोर कारवाई करण्याची मागणी केली आहे.
