बनावट सोनेतारण प्रकरणात धक्कादायक माहिती ; संत नागेबाबा मल्टिस्टेट” मध्ये २ किलो बनावट दागिने..
संत नागेबाबा मल्टिस्टेट” मध्ये २ किलो बनावट दागिने..!
नगर प्रतिनिधी – बनावट सोनेतारण कर्ज प्रकरणातील फसवणुकीचा आकडा दिवसेंदिवस वाढतच आहे. संत नागेबाबा मल्टिस्टेट सोसायटीमध्ये आणखी २ किलो बनावट दागिने आढळून आले आहेत. त्याद्वारे ६९ लाख रुपयांचे कर्ज घेण्यात आले होते. दरम्यान, या प्रकरणी कोतवाली पोलिसांनी अटक केलेल्या पाचही आरोपींची न्यायालयीन कोठडीत रवानगी करण्यात आली आहे.
शहर बँकेत सुमारे साडेनऊ किलो बनावट दागिने आढळले आहेत. त्याद्वारे बँकेची साडेतीन कोटी रुपयांची फसवणूक करण्यात आली आहे. त्यानंतर नागेबाबा मल्टिस्टेट सोसायटीमध्ये सुमारे अडीच किलो वजनाचे बनावट दागिने आढळून आले. त्याद्वारे ७९.१९ लाखांची फसवणूक झाली आहे. आता आणखी कर्जदारांची खाती तपासली जात आहेत. त्यामुळे फसवणुकीचा आकडा वाढत आहे.
सोमवारी रात्री व मंगळवारी दिवसभरात आणखी १३ जणांची ३२ खाती तपासण्यात आली. त्यात २ किलो १० ग्रॅम वजनाचे बनावट दागिने आढळून आले. त्याद्वारे ६९ लाख ३ हजार रुपयांचे कर्ज घेण्यात आले होते. दरम्यान, नागेबाबा सोसायटीत आत्तपर्यंत साडेचार किलो बनावट दागिने आढळून आले असून, फसवणुकीची रक्कम सुमारे दीड कोटींवर पोहचल्याचे पोलिसांकडून सांगण्यात आले.