मित्र म्हंटले कि आला सगळा भोळा कारभार, जवळच्या मित्रांवरकोण अन्ही विश्वास ठेवणार ? पण एका मित्रानेच खोटे बोलून मित्राची फसवणूक केली आहे. एका टपरी चालकाला वैद्यकीय उपचारांसाठी पाच हजार रुपयांची गरज होती. त्याने ती मित्राला सांगितली. मित्राने पैसे नाही, पण सोने आहे व ते आपण तारण ठेवून कर्ज घेऊ असे सांगून कागदपत्रांवर टपरी चालकाच्या सह्या घेतल्या व तो गायब झाला.

इकडे टपरी चालक पाच हजारांची वाट पाहत राहिला व काही दिवसांनी त्याच्या नावावर बनावट सोने तारण ठेवून तब्बल 2 लाख 80 हजारांचे कर्ज ‘त्या’ मित्राने घेतल्याचे पोलिसांनी त्याला सांगितले. टपरी चालकाने डोक्याला हात लावला व आता पोलीस चौकशीचा ससेमिरा मागे लागल्याने रडकुंडीला आला आहे. नगरमध्ये उघड झालेल्या सुमारे 6 कोटींच्या बनावट सोनेतारण कर्ज प्रकरणात काहींच्या परिस्थितीचा फायदा उठवत फसवणूक केल्याचे समोर येत आहे.

शहर सहकारी बँकेत आतापर्यंत 8 हजार 933 ग्रॅम म्हणजे सुमारे नऊ किलो बनावट सोन्याचे दागिने तारण ठेवून त्यावर कोट्यवधी रुपयांचे कर्ज काढले आहे. या प्रकरणात 37 जणांविरुद्ध गुन्हा दाखल आहे व 3 कोटी 22 लाखांची फसवणूक झाल्याचे स्पष्ट झाले आहे. तसेच श्रीसंत नागेबाबा मल्टीस्टेट सोसायटीमध्ये 8 हजार 564 ग्रॅम म्हणजे सुमारे साडेआठ किलो बनावट सोन्याचे दागिने तारण ठेवून कर्ज उचलण्यात आले आहे. या गुन्ह्यात 53 आरोपींचा समावेश असून आतापर्यंतच्या तपासणीत 2 कोटी 88 लाखांची फसवणूक झाल्याचे स्पष्ट झाले आहे.