पुणे, प्रतिनिधी: जिल्ह्यातील पुरंदर तालुका येथे आम आदमी पार्टीच्या नवीन जनसंपर्क कार्यालयाचे उद्घाटन पार्टीचे महाराष्ट्र प्रदेश उपाध्यक्ष ॲड. धनराज वंजारी यांच्या हस्ते नुकतेच पार पडले.
यावेळी पार्टीच्या पुरंदर – हवेली विभागामार्फत आयोजित जनसंवाद मेळाव्याला संबोधित करत असताना ॲड. धनराज वंजारी यांनी अरविंद केजरीवालांची ‘भारतवाद’ ही संकल्पना समजावत छत्रपती- फुले- शाहू- आंबेडकर यांच्या विचारांचा प्रचार व प्रसार ही आजच्या काळाची गरज असल्याचे नमूद केले.
या माध्यमातून आगामी महानगरपालिकेच्या निवडणुका नजरेसमोर ठेवत संघटना वाढीच्या दृष्टीने पदाधिकाऱ्यांच्या नियुक्त्या जाहीर करण्यात आल्या. तसेच आदर्श सरपंच, आदर्श ग्रामसेवक, आदर्श महिला बचत गट यांचा सामाजिक पुरस्कार वितरण सोहळा देखील मोठ्या उत्साहात पार पडला.
याप्रसंगी आम आदमी पार्टीचे पुणे जिल्हाध्यक्ष मुकुंद कीर्दत, जिल्हा संघटक अमोल कड व जिल्हा सचिव अक्षय शिंदे यांसह अन्य पदाधिकारी, कार्यकर्ते व स्थानिक नागरिक मोठ्या संख्येने उपस्थित होते.
